Letras galegas 2019
O Día das Letras Galegas é unha celebración instituida en 1963 pola
Real Academia Galega para homenaxear a aquelas persoas que
destacasen pola súa creación literaria en idioma galego ou pola
defensa da devandita lingua.
Cada ano dedícase a unha
personalidade diferente, escollida pola Real Academia Galega, tendo
en conta que se esixen polo menos dez anos dende o seu falecemento.
Dende a instauración desta celebración cultural, soamente en 1998
houbo unha dedicación conxunta a tres poetas medievais: Martín
Codax, Xohán de Cangas e Mendinho, famosos polas súas cantigas.
A data de celebración deste evento, o 17 de maio, débese a que en
tal día como ese, en 1863, publicouse en Vigo o primeiro exemplar da
obra Cantares Gallegos, de Rosalía de Castro, que marcaría o inicio do
"Rexurdimento" ou renacemento cultural do galego. Esta data é
oficialmente festivo na comunidade galega dende 1991.
Neste ano 2019, a figura homenaxeada é Antonio Fraguas Fraguas,
escollido pola Real Academia Galega con dezaseis votos a favor fronte
a oito que tiña a candidatura de Ricardo Carvalho Calero.
O académico que encabezou a candidatura gañadora, Francisco
Díaz-Ferros, erixiu ao historiador e xeógrafo como unha "figura do
galeguismo", referente "xa non só polo seu talante ético de defensa
permanente do galego, senón pola súa capacidade de transmitir estes
sentimentos a todo o mundo". Ademais, destacou os máis de 300 libros e
traballos que desenvolveu Antonio Fraguas, unha "obra importante e de
densidade" na que mostrou un galego "tan particular, tan auténtico, tan
sinxelo e tan cariñoso" que "non houbo ninguén, quizais, que o fixese
desa forma tan persoal e directa" expresou. E é que Antonio Fraguas,
segundo o académico, recuperou "a voz do pobo": "Chegou no
momento preciso para recoller os alicerces da nosa cultura, o noso
mundo, o mundo campesiño que xa estaba a desaparecer".
Nas bibliotecas de Dumbría podes ver o material bibliográfico do homenaxeado así como unha mostra de cartelería editada pola Xunta de Galicia na que se explica a súa traxectoria profesional e persoal.